Ray Lauffer ta presentá ‘Nan no sa..’

Awe t’e dia ku Ray Lauffer ta lansa otro kansion promoshonal. Na sèptèmber di 2017, Ray a inisiá un kolaborashon ku Decoded i a introdusí su promé proyekto independiente- lòs for di agrupashonnan musikal lokal. For di sèptèmber 2017 pa awor, Ray a bolbe demostrá kresementu komo artista i poko poko pero sigur ta birando un di e artistanan mas solisitá na Kòrsou. No únikamente den farándula ritmo kombiná, pero tambe ku presentashonnan komo solista na eventonan públiko i privá. Durante di e lunanan previo Ray a buska su identidat komo kompositor. Despues di e mash-up di “Distance” di Omarion i “Shape Of You” di Ed Sheeran, awe Ray Lauffer ta lansa un kansion propio i na papiamentu!

E kansion “Nan No Sa” ta un komposishon di Ray Lauffer bou di guia di Quincy ‘Biggie’ Comenencia. E piesa den ritmo zouk-a-dub a keda produsí dor di Randy Rosheuvel i Ray Lauffer. Ray ta splika ku esaki ta un ritmo nobo ku e ke introdusí, ”E ritmo zouk-a-dub tin elementonan tropikal pero ei mes tin e sabornan usual di ‘denbow’. E piesa ta papia di un pareha enamorá, pero klaro skondí pa sobrá. Un piesa sèksi, pero ei mes sufisientemente komersial. Mi ta spera ku fanatikonan disfrutá di dje.” Mixing i Mastering tabata den man di Efrem Mambi i Sean Cannister. E siguiente kansion di Ray ta programá pa komienso di sèptèmber 2018 i lo ta na spañó ; e intenshon ta pa hasi un promoshon pa aktivá e karera di Ray den Latinoamérika. Por sigui Ray riba Instagram @RayLauf i Facebook @RayLauffer. Fanatikonan por mira e videoclip riba e Youtube Channel @Skempi òf solisit’é na nan radio preferí. Ademas, por stream riba ITunes, Spotify, Tidal i Apple Music tambe.

#CURACAO #LOCAL

Featured News
Recent News
Archive
Search By Tags