Freddy ‘Rasta’ su promé EP titulá ‘Fake Love’


E popular kantante arubiano, konosí den e género di urban, Freddy Richardson mihó konosí komo ‘Rasta’, ta pendiente pa lansamentu ofisial di su promé EP titulá "Fake Love"

‘Rasta’ sigur no mester di muchu introdukshon, mirando ku na numeroso okashon, el a yega di presentá kansionnan ku a sa di pega bon den farándula. Ta trata aki tambe di un kantante ku a presentá ku hopi otro artista konosí, tantu na Kòrsou, Aruba i tambe Boneiru.

Na komienso di e aña aki, den temporada di Karnaval, Freddy a presentá na e festival di “Caiso & Soca’, na Aruba. Tabata aki, ku el a sa di konkista e puesto di segundo finalista, ku e kansion 'For once & for all’.

Esaki huntu ku otro dos kantante mas di Aruba, kende nan ta ‘Blacky’ i ‘Tony Mingo’, unda nan a konta ku kompañamentu musikal di e banda Buleria. Por sierto ta un kansion ku durante di su temporada, a sa di bira e kansion mas popular.

Awor Rasta ta kla pa presentá su EP, ku lo konta ku un total di 7 piesa i tambe ku lo sa di konta ku presentashon speshal, di algun artista sumamente popular.

Nòmber di algun piesa i artista ku TRENDSZ por antisipá bo riba dje ta entre otro: “Mané bo ke" huntu ku Zoinx. 'Fake Love' huntu ku Givienca ‘Gigi’ Clotida, ku ta e piesa ku lo ta e nòmber di e EP. Tambe tin 'Downlow' huntu ku Awaras i 'Commando’ huntu ku Jair ‘Buddy’ Vesprey, ku lo bai ta un ‘cover song’.

Djarason, dia 26 sèptèmber próksimo, riba fecha natal di Freddy lo lansa e EP. Tambe ta e intenshon pa hasi grabashon di videoclip pa algun di e piesanan, pero esakinan lo keda presentá mas despues.

TRENDSZ ta deseá Freddy, for di awor, tur klase di éksito ku e EP i ta spera di skucha muchu mas di dje pronto.

#BONAIRE #ARUBA #CURACAO #URBAN

Featured News
Recent News
Archive
Search By Tags