Jaido tin dos álbum na kaminda!


E popular kantante di Urban, Jaidorick 'Jaido' Woods, ta pendiente pa lansa dos álbum riba merkado. ‘Jaido’ ta un artista ku no mester di niun klase di introdukshon, mirando ku pa sigur e último dos añanan por konsider’é komo e ’Rei’ di Urban. Esaki ku diferente hit riba su nòmber i su presentashonnan úniko, den tur ambiente.

Di informashon ku TRENDSZ ta disponé di dje, ta ku e hóben kantante di Urban, ta preparando pa lansamentu di dos diferente álbum riba merkado. Di esakinan un lo ta na papiamentu, miéntras ku e otro lo ta na hulandes.

E álbum na papiamentu lo bira ‘Jaido’ su promé álbum ofisial. Lo tin un total di 9 ‘track’ ariba. Lo figurá piesanan manera 'Side chick' huntu ku “Devi Dev”, kual ta e piesa ku a keda lansá pa antisipá e álbum.

Miéntras ku algun otro temanan musikal ku lo figurá riba e álbum lo ta, 'Bai pafó' i 'Kla p’e'. E álbum aki, ta pendiente pa wòrdu lansá lat den luna di sèptèmber 2018, pa mas tardá komienso di òktober 2018.

Pa loke ta trata e álbum na hulandes, TRENDSZ mester señalá ku aktualmente e kantante/artista/deportista-pelotero ‘Jaido’, ta na Hulanda, i ta den preparashon di esaki. E ‘Rei di Urban’ a bai pa hasi algun grabashon i mesora feature algun artista na Hulanda. Tur esaki ta pa asina, krea su ‘netwerk’, pa ora tur kos ta kla.

E álbum na hulandes, lo keda lansá na aña 2019 Dios mediante. Pues tur fanátiko di ‘Jaido’ i prinsipalmente e amantenan ku ta gusta e género urban, keda pendiente ya ku ‘Jaido’, tin kos nobo na kaminda. Finalmente TRENDSZ, ta deseá ‘Jaido’ tur klase di éksito, sperando ku lo sigui tende muchu mas di dje.

#CURACAO #ARUBA #BONAIRE #URBAN

Featured News
Recent News
Archive
Search By Tags