Despues di 8 aña ‘Ali Ras’ ta bèk i ta presentá ‘Bendishon di Jah’


TRENDSZ a sostené un kòmbersashon, ku ‘Ali Ras’, kende despues di 8 aña ta lansa un tema musikal nobo riba merkado. Ta trata aki di e piesa “Bendishon di Jah”, ku por bisa pa e korto tempu ku e piesa a sali, ya e ta ser konsiderá un ‘hit’ pa e artista.

‘Ali Ras’ su karera musikal a inisiá na aña 1992, huntu ku DJ Faried, pa seguidamente tambe e djòin otro popular DJ/animadó, kende ta Armando Huerta. E la konsiderá su inisio ku esakinan, komo un stazje, den su karera musikal i artístiko. Na aña 1997 ‘Ali Ras’ a djòin e formashon ‘Dancehall Dreams’. Esaki tabata huntu ku entre otro ‘Dòbel Ras’ i tambe defuntu ‘Rasta Rish’. Aki ‘Ali’ a bira mas konosí i inkluso a pega vários hit huntu ku e formashon, manera entre otro 'Spil o spil' i 'Sintimentu ’, tambe tabata hitnan èkstra base ku e la sa na konektá. Despues di ‘Dancehall Dreams’, ‘Ali’ a bai establesé su mes na Hulanda i a bai focus un poko mas riba su formashon personal.

A base di hopi petishon di fanátikonan, tabata na aña 2010, ku ‘Ali Ras’, a lansa e tema musikal, ku a hiba di titulo “Jah semper ta ei nan", kual a bira konosí hopi mas tantu aki na Kòrsou, debí na defuntu DJ Renzo, kende tabata konsiderá esaki komo su himno. TRENDSZ a probechá tambe pa puntra e Yu di Kòrsou aki, for di unda e inspirashon di e piesa "Bendishon di Jah", a bini.

“E inspirashon di e piesa aki a bini, na momentu di hiba sierto kòmbersashonnan, ku nos mes yunan di tera, semper e parti negativo ta resaltá. Ta einan mi a opta pa saka un piesa, ku un mensahe pa e pueblo por skucha i meditá riba dje i ta mas positivo. Ku esaki tambe nos por kanta realidatnan di bida, ku entre otro nos kada unu mes a eksperensiá i desishonnan ku por a wòrdu tumá otro”, ‘Ali Ras’ a splika.

Miéntras ku riba e pregunta, kiko ta su plannan pa futuro, ‘Ali Ras’ a duna di konosé, ku tin hopi piesa mas na kaminda, unda ku tin ku ya ta kla kaba, huntu ku su videoclip. Riba esaki e no kier a bai den detaye riba e nòmber i a duna di konosé di lo kier djis solamente divulgá ku e kansion lo bai papia di stima otro mas i ta kontentu tur dia. Finalmente, e artista Yu di Kòrsou, ‘Ali Ras’, kier a gradisí un i tur ku a aseptá e kansion i ku lo e ta kontentu ku si esaki por inspirá kada unu, di tin dushi sintimentunan pa hasi kos bon so, prinsipalmente na momentu ku skucha 'Bendishon di Jah'.

#URBAN #CURACAO #NEWRELEASE

Featured News
Recent News
Archive
Search By Tags