‘1OAK’ ta lansa CD-live pendiente pa selebrashon 1 aña
TRENDSZ, a sostené un kòmbersashon ku e kantante i alabes kabesante di e agrupashon musikal arubano, ‘One Of A Kind’ (1OAK), kende ta e konosido Jurick Salomón.Esaki riba desaroyonan di e agrupashon musikal i plannan pa futuro, prinsipalmente kon ta planiando pa selebrá nan promé aña di eksistensia.
Salomón a duna lo siguiente di konosé:
“Ta asina ku ‘1OAK’ ta preparando e selebrashon di nan promé aña di eksistensia den farándula. En konekshon ku esaki ta bai tin un fiesta grandi, pa selebrá ku tur fanátiko ku a sa di sostené e agrupashon musikal durante di e aña aki. Lo bira un selebrashon ku lo tuma lugá, riba djasabra, dia 27 di òktober próksimo.
Ta hasiendo esfuerso, pa e anochi aki konta tambe ku músika di un agrupashon musikal direktamente for di Kòrsou, kual ainda lo mester keda konfirmá” Mas aleu Jurick a duna di konosé na TRENDSZ, ku nan ta grabando tambe un ‘CD-live’, ku pronto lo ta riba merkado. Miéntras tantu ta e intenshon pa den transkurso di entre 1 pa 2 siman mas o ménos, e promé piesa ‘live’, kuminsá zona na tur radio-emisora.
Esaki lo bai ta un grabashon, ku lo bira un tema musikal konsistiendo di diferente parti di temanan di e legendario Juan Luis Guerra, ku lo keda interpretá pa Jurainy Luckert, kende ta un di e kantantenan di e banda.
Miéntras ku tambe ta pendiente pa piesanan nobo wòrdu lansá próksimamente. Esaki durante di e lunanan benidero. TRENDSZ ta deseá hinter e tim di ‘1OAK’, tur klase di éksito i ku pronto lo por skucha muchu mas di nan.
