Ataniro ta risibi homenahe 30 aniversario den farandula


AUA// Diabierna anochi den Cas Di Cultura na Aruba a reconoce Janiro Eisden pa su 30 aña den farandula di Aruba. Ataniro ta un artista Arubiano cu a bai te den top di popularidat riba islanan ABC y Hulanda, y hasta ta wordo concidera un pionero pa e genero urban. Minister di Finansas y Cultura, Xiomara Maduro na e ocacion aki a skibi riba su pagina riba red social, " Niro of Ataniro ta un artista cu nos ta admira pa e manera con e ta canta y rima den nos dushi Papiamento. Masha pabien Ataniro, masha danki pa bo aprecio enorme pa nos idioma y cu nos bon Dios por sigui bendiciona bo talento unico".


Durante su discurso Minister Maduro a recorda con Janiro Eisden a inicia su carera den musica. Como un hoben yen di curashi el a lanta e banda ‘Basic One’ y a cosecha exito cu e cancion ‘Suave’. Despues di esaki tur aña Niro ta produci tres pa cinco cancion cu ta figura den Top 100 di nos radionan emisora y tambe na nos islanan ruman, caminda el a bira un eminencia. E mandatario a sigui bisa cu Janiro ta haci historia como e prome ‘rapper’ cu a ‘rap’ na Papiamento na Aruba ya cu esaki ta un genero di musica cual e idioma Ingles tabata domina. El a demostra su aprecio pa nos idioma y a haci cu e ‘rap’mento den nos idioma Papiamento, a bira popular y a bira parti di cultura di nos pais. Janiro a haci hopi frase cu e ta usa den su cancionnan, bira un dicho den Papiamento, ya cu por ehempel ora nos ta pasa bon, nos ta bisa ‘E cos aki ta dushi, e cos aki ta dushi mes’. Janiro ta hopi orguyoso di su distrito San Nicolas, caminda cu el a nace. Esaki e ta demostra dor di graba su videonan den San Nicolas cu actuacion di e hobennan di San Nicolas. Ta di admira con e ta yuda promove e distrito cu a wak’e nace y crece den su carera musical. Ataniro a participa tambe varios biaha na Calypso Contest y a sali e cantante mas popular. El a subi e tarima di Tumba Festival na Aruba y tambe na nos hermana isla Corsou. Na Aruba el a sali na di dos lugar y na Corsou el a clasifica den final y a marca historia ora su cantica a sali e cantica popular di caya na aña 2015. E mandatario ta gradici e hobennan di ‘Gang di Arte’ y ‘Dream Dare Do’ cu a bin cu e iniciativa p’e celebracion aki y cu hunto cu Departamento di Cultura a hinca un bunita show den otro y dedica esaki na Ataniro. Un palabra di gradicimento tambe na Fundacion ‘Everything is Possible’ y ‘Centro di Bario Dakota’ cu tambe a coopera pa haci e evento aki posibel

Featured News
Recent News
Archive
Search By Tags