Bena Mayó ta lansa videoclip i produkshon original titulá: Warwarú Seú



16 di mart 2021 ultimo e agrupashon musikal Bena Mayó a lansa riba plataformanan di media sosial su videoclip i produkshon original nobo titulá: Warwarú Seú. Ku e produkshon i e videoklep akí, Bena Mayó ta transmití su amor pa seú, i kompartí su vishon pa ku modernisashon di nos músika kultural. Bena Mayó ta kere firmemente ku nos músika kultural ta un ardu prinsipal di nos kultura i identidat komo Yu di Kòrsou.


Warwarú Seú

E idea pa e komposishon akí a nase algun aña pasá durante di un marcha di seú. HPA (Hóbennan positivo i aktivo) tabata tokando den kaya i tabatin simpatisante i fanátiko di HPA kantu di kaya ku a ekspresá ku ta manera un horkan di ritmo, ambiente i alegria ta pasa ora nos toka den marcha. E palabranan akí a inspirá Rendel Rosalia riba e idea di warwarú seú, i huntu ku Marvin Snijders e idea a transformá i kulminá den un tremendo komposishon alegre i festivo.


E areglo i produkshon di e komposishon akí tabata na enkargo di direktor musikal di Bena Mayó: Elbert Jozefa. Klaramente pueblo lo por skucha ku Bena Mayó a sigui eksplorá i eksperimentá ku seú. Warwarú seú tin elementonan musikal nobo kombiná ku elementonan tradishonal, asina lo por skucha zonido tradishonal di barí, chapi i kachu i elementonan modèrno manera bas, kuarta, keyboard i tambe zonido di bras akústiko ku ta e elemento mas resien ku nos a inkorporá. E instrumento di perkushon Cubano ‘batá’ tambe ta lusi den e komposishon tresiendo un rikesa perkusivo den e totalidat.


Rumichel Marchena (eks Kantadó Mayó) ta e intérprete prinsipal i Lady Lava tambe ta trese un intermeso musikal sabroso ku su estilo urban úniko, esaki ta otro elemento ku ta hala atenshon den e komposishon akí.


Videoclip

E ‘videoclip’ tabata na enkargo di Cindy Jozefa do Rego ku ta nos direktor kreativo i kordinadó general. E videoclip ta konta e historia di Warwarú seú ku imágennan kolorido i nítido kapturá pa Mauricia Pictures i Grayen Pastor. Grupo FAK (Folklóriko Ambiente kultural) i ID dance group tabata na enkargo di koreografia i baile kombinando aspektonan di baile tradishonal i tambe moveshonnan moderno i asina tresiendo inovashon riba e tereno di baile tambe. Henter e esfera rònt di e videoclip akí ta pa promové inklushon di tur gremio, grupo, género i rasa. Ora alarma zona i e anunsio di kódigo kòrá drenta ta tur hende ta evakuá i subi kaya gosa!




Featured News
Recent News
Archive
Search By Tags