Kim Kardashian: “Ta parse ku niun hende ke traha awendia”

Un video di Kim Kardashian papiando di muhénan profeshonal ta risibiendo bastante krítika. E video ta un entrevista di revista Variety ku Kardashian, su rumannan Khloe i Kourtney, i nan mama, Kris Jenner. E famia tabata promové nan próksimo reality show riba Hulu, ‘The Kardashians’. “Mi tin e mihó konseho pa muhénan empresario, of ku ke un negoshi. Lanta bo s**ka i traha. Ta parse ku niun hende ke traha awendia”, Kim Kardashian a bisa den e entrevista. Su ruman Kourtney a bai di akuerdo, bisando ‘esei ta bèrdat’. “Bo mester rondoná bo mes ku hende ku ke traha”, el a agregá. E komentarionan no a kai den bon tera, hopi hende mesora a komentá ku Kardashian ta bin di un famia hopi riku, i ta biba na Beverly Hills. Tambe, tabata tin hopi hende ku a bisa ku Kim no ta tende kuenta ku muhénan ku tin yu i ku mester kuida nan famia.